Maghinang Blog: Magpiy’ Title/URL


Assalamu Alaykum wa Rahmatullah!

Bihaun diy ha blog natu’, Tausug Bloggers, dumihil kami maniyu’-tiyu’ pangadjian atawa kan tips bang maghinang blog. Hambuuk ha manga mahalga’ subay taliun tuud sin hambuuk tau mabaya maghinang blog amuna in pagpiy’ sin TITLE sin blog niya iban na sin URL atawa kan Uniform Resource Locator. 

In “Blog Title” amuna in ngan sin blog hinangun niya yaun. Amuna ini in gumuwa ha web browser sin manga mamassa sin blog niya. Amura isab ini in gumuwa’ ha manga search engine sin mga tau bang sila mag-lawag (search) sin ngan sin blog niya. Hawpuun ta amuna ini in ngan sin blog niya.

In URL isab amuna in gumuwa ha address bar navigation sin web browser sin mamassa. Amuna yan in pagtawagun “website address” amun tiyatagnan sin “www.” iban ikugan sin “.com” atawa “.org” iban sin kaybanan pa. Bang kaw mag-usal mga free blogging site biya’ na sin blogger iban wordpress, masi2 yan naka-agad ha URL mu in domain nila (anakiluh.blogspot.com). Ma-iyg mu hadja ini bang kaw mamiy sin domain mu isab bat siya mahinang na “anakiluh.org” iban kaibanan pa. In title bukun sibu’ iban sin URL. Makajari mu papagsibuun in Title iban URL, makajari da isab diy’. Labayan ta mayan in ini ha susungun pangadjian.

Ini in mga subay tumtumun bang kita magpiy’ blog title iban URL.

MAGPIY’ BLOG TITLE IBAN URL


Bang maghinang blog title iban URL, subay taliun tuud sin hambuuk blogger in mga ini:
1. Unu in maksud sin blog.
Mangdihil baha’ pangadjian agama? Mangsuysuy sin kabuhi’ niya (personal)? Manghindu’ manga indaginis kapandayan?Magpakita’, magshare sin mga kapatta’-pattaan niya? Mangisturi tungud ha manga kahayup-hayupan? Mamaytai tungud ha pakaradjaan sin hula’ iban raayat? Atawa kan lamud-lamurun na? Bang kaingatan na sin blogger in maksud sin blog niya, maluhay na siya makapikil sin title sin blog niya.

Tip: labi marayaw in awn tuud hambuuk maksud “theme” sin blog. Bang manjari kahallian, subay tuud hallian sin hambuuk blogger in paglamud-lamurun in topic/theme pasal mahilu in magbabassa. (In blog ku “Anakiluh” lamud-lamud siya, hangkan mataud magkahilu bang unu tuud yaun hehe)

2.   Ayaw magpinda-pinda title.
Bukun marayaw in magpinda-pinda title. Pasal mayta’? Apabila awn na nakakila sin blog mu pila tahun, pag-ubus tagha’ piyndahan mu in title iban URL, na di’ na kabatukan balik sin mga bakas namassa sin blog mu. Gumuwa siya “Lost Address”. Hangkan bang magpiy’ sin blog title, subay taliun sin maghihinang blog sin amuna yaun in tantuhun niya title sin blog niya. Subay niya paghulugan pikilan marayaw ha wala’ pa siya nakahinang sin blog niya.

Bang sawpama awn na kaw title naregister, di’ da maunu pindahan mu in title, sa ibut-ibut in URL ayaw mu pindahi bang kagausan luba na bang kaw mataud na mamassa (readers/followers). Sa’ bang mabaya nakaw tuud isab pindahan, na manjari mu ra isab pindahan. Sa’ in guwa’ niya ini subay mu baytaan in katan mamassa mu sin nagpinda kaw URL bat sila di’ maglawag.

3.       Piy’ kaw title marayaw.
Mabilang marayaw in title bang ha pagbassa na mayan sin title, agun maingat na sin mamassa unu in maksud sin blog/site mu.

In the best na ha title sin blog mahaba’ na in manga 2-3 words hadja. Sawpama yan in “All Tausug”, “Hijabified”, “Indaginis Langan”, “Tarasul net”, “Sinama.org”, “Kawman kasilasa”. Bang mu kitaun in manga title nila hawpu’ da ,sa’ karihilan na kaw “mental picture” bang unu in blog yaun, yadtu na agun ha title biyabayta’.

4.       Subay in Title iban URL maluhay tumtumun.
Mapuas sin maksud sin blog, subay in lawagun title sin hambuuk blogger maluhay tumtumun. Ayaw ra magpahunit sin ngan sin blog mu. Bunnal marayaw isab in nakabidda’ in nga sin blog mu (sawpama “Indaginis Langan”)sa’ bang isab makalandu’ in hunit tumtumun, na tantu, di’ makabatuk in mamassa (readers) mu. Tumtuma nagblog kaw bat kaw makapasampay sin maksud mu. Bang di’ katumtuman sin magbabassa blog in ngan sin blog mu, misan biya’diin in lingkat sin blog, malawa’ in pus niya. Di’ siya kabatukan.

Biya’ na sin sawpama sin title mahunit tumtumun:
sample Title:  Esquihieficous, My sweet life forever blog
 URL: www. Esquihieficoussw8lyf4ever.wordpress.com

Di’ tuud yan manjari in bihan, makaulung in mamassa sin blog mu. Hallian ar a isab in mag-usal manga special characters ha URL biya’ na sin dash “-“, Underscore “_”, apostrophe (‘) iban kaybanan pa. Makaganap hadja ini hikahilu ha mga maglawag sin blog mu.

5.       Ayaw magpahaba’ sin Title iban URL.
Biya’ da sin maksud sin nakauna, subay di’ magpahaba’ sin ngan sin blog mu hasupaya maluhay katumtuman sin mga magbabassa. Awn bagay ku naghinang siya blog, pasal awn siya manga award iban manga organization iban “cause” hipromote. In hiynang niya title (sawpama hadja) “Ahmad Muktar-Gawad serbisyo awardee cause for the indigenous people and Muslims in the southern Samar of the Philippines.”
Bihadtu ra isab in URL niya: www.ahmadmuktargawadserbisyoawardeecausefortheindigenouspeopleandmuslimsinsouthernahmad.blogspot.com
Na kadtui kunuh hisiyu in makatumtum hayan?

Ibut-ibut ayaw niyu ini singuri.


Bang sawpama in blog mu pasal sin organization ubus mahaba in ngan, usala in acronym sin Organization, atawa kan lawag kaw hambuuk atawa duwa kabtangan kumugdan mamaytai ha tumpukan niyu Sawapama awn kaw tumpukan in ngan “Band of Brothers in Siasi”. Dayng sin hisulat mu in title “Band of Brothers in Siasi Sulu” ubus in URL www.Bandofbrothersinsiasisulu.blogspot.com”. Manjari mu gantian pa “BOB Siasi” in title, ampa mu ganapan ha description in meaning sin “BOB”, pag-ubus in URL mu “bobsiasi.blogspot.com”. Hawpu’ na maluhay pa tumtumun.

=========
Bunnal in Title iban URL sin blog amuna in mahalga’ ha ahmbuuk blog pasal amu yaun in kadtuun lawagun sin mamassa. Biya’ da isab siya sin address ha bay mu, bang awn mamisita kaymu, subay maluhay nila katumtuman in address mu ha supaya daran-daranun nila in pagbisita pa bay mu. Bihadtu ra isab in blog. Bang yan maluhay tumtumun ubus hawpu’ da, maluhay da isab makabisita maun in mga mamassa mu. Hangkan subay piy’un tuud marayaw sin maghihinang blog atawa kan website in title sin blog/site niya.

Maray’ dayndiy ku naa tubtuban in pangadjian ha “Pagpiy’ Title iban URL” sin blog. Ha sumunu’ pangadjian natu’ isab in biya’diin mag-hinang iban mag-ganti’ title iban URL.


Mahuli, magsukul ha pagdihil waktu mamassa ha ini, bang awn kiyta’ niyu salla’ andu’ baytai niyu aku bat ta mapabuntul magtuy.

Salam Kasilasa!
Anakiluh, Tausug Blogger

========================================================================
Hi Anakiluh tagdapu sin blog Anakiluh,MD, Warnah Photoblog, Tausug101, iban kamawmuhan mag-iban da isab siya mag-manage sin kaybanan website biya’ na sin IMAN, Buhay RSO, UVPN, iban na sin Tausug Blogger. Maluhay niyu ra kabatukan hi Anakiluh ha FB Page niya: Anakiluh Publications.
Saturday, July 19, 2014
Posted by Ahmad Ibn Hajiri

Pag-usaha ha Blog


 by Yazir Rajim
From: http://www.alltausug.co.cc/2009/12/pagusaha-ha-blog.html


Awn daying ha manga maghihinang blag in sila di' da tuud maghasil sin mausaha hapaghinang blag. Karna' in maksud nila bangman sila makapasampay sin ha laum atay nila papagkahi manusiya'. Damikkiyan awn da isab daing ha kaibanan mabaya' sila magusaha sambil magpasaplag sin ha laum atay nila pa pagkahi nila. Unu-unu na in panindug ta ha tungud magblag di' dadtu hikaunu.

In pagblag in bunnal niya hikasiyn, karna' ba'gu-ba'gu ini kita' ku in google ad sense akaun ku awn na luun dollars. Bima'na bukun na hadja hat suy-suy atawa nabassa ku, adapun kiyasaksian na sin duwa mata ku.

Biyadiin in kausaha ta ha blag?

In magusaha ha blag in kalagihan subay awn na asal nahinang blag ha Blogger atawa ha Wordpress atawa ha kaibanan websites.

Bang awn na blag nahinang mu agara in pamandu' ha baba' ini:

1.Sud kaw pa akaun mu ha blogger.com, pagukab sud kaw madtu pa Lay-out. Pagsud mu pa Lay-out, dupuni in add a gadget. Pagguwa sin tuung-tuung lawaga in Ad sense.

2. Bang mu kabaakan dupuni in adsense. tagari awn dasan gumuwa'. Pagguwa sinConfigure Adsense, ikaw na in magpi' sin Size sin banner hibutang mu ha blog mu.

3. In google adsense awn akaun niya. Subay kaw lumuun bayta' sin baran (data) mu palaum ampa kaw makaukab akaun.

4. Bang awn na napi' mu dupuni in Save. Ikaw na in magtakin bang hawnu mu patungurun in adsense mu yan. In sarayaw-rayaw niya bukun ha baba' hibutang mu.

Wednesday, October 24, 2012
Posted by Tausug Magsusulat

Magbutang Favicon ha Blog


by Yazir Rajim
from: http://www.alltausug.co.cc/2009/12/magbutang-favicon-ha-blog.html

Unu in Pagtagun FAVICON?



In Favicon amuna in kakitaan mu sibi'-sibi' logo nakabutang ha taas sin blog atawa website. In Laggu' niya ha kiyasulayan ku 100X100 pixels. Depende na kaniyu misan makaasibi' pa daing ha laggu' yan ayaw hadja makalaggu'.

In format niya makajari GIF, PNG, iban JPEG.
Yari in manga hinangun bang kaw mabaya' magbutang Favicon ha Blog atawa Website mu.

- Hinang kaw graphic biya' sin laggu' nasabbut ku ha taas.
- Pagsign-up kaw ha Photobucket atawa unu unu na "Host" websites. (ubus magdesign sin icon logo ampa mu hi upload hi Photobucket atawa unu unu na sites).
- Ampa kaw sud pa Dashboard sin blogger.com.
Klika in Layout ----- Edit Html
- Ha di' pa kaw magbutang sin code, Back up pi naa in templates mu. (In pagback up klika hadja in Download full templates) Ampa butangan ha baba' sin /head, biya' sin suntu' ha baba' ini.



 

http://i1003.photobucket.com/albums/af152/alrezai/Tausugicon.png


Atawa kawaun muna hadja in direct link sin logo amun kiyabutang mu ha photobucket atawa unu unu na webhost ampa mu gantian in url siyasapan biyaning yan:

Posted by Tausug Magsusulat

Magbutang Widget pa Blog


By Yazir Rajim
From: http://www.alltausug.co.cc/2009/12/magbutang-widget-pa-blog.html

Ha di' pakaw makakawa' Widget ha dugaing site sud naa kaw pa account mu hahttp://blogger.com Pagsud mu pa laum dupuni in "layout". Bang kaw didtu na ha Layout dupuni in "Add a Gadget". Bang maukab lawaga in "HTML". In gumuwa' bihaini in dagbus:



Bang gumuwa na in html box ampa kaw umukab ha kaw ha Google Search Engine sin manga kalalagihan mu widget. Atawa pi' na hadja kaw sin hibutang yan da mataud widgets nakabutang ha add gadget window yan.


(Bihaini in dagbus sin HTML BOX)


Pagsud mu pa halaman sin Widget ikaw na in magpi' bang unu in kabayaan mu hibutang. Ubus mu magpi sin Widget lawaga in "Get Code" atawa "View Html file". Awn waktu in "Code" nakabutang asal ha baba' sin widget. Bang awn na Code atawa html file kakitaan, in hinangun mu right click the mouse ampa mu dupuni in "Select all".

Paghiglight mu ha code hi Right click mu in mouse ampa mu dupunan in copy. Pagubus mu copy hun kadtu kaw pa HTML box ampa mu hi "Paste" didtu. bang in code ha laum na ampa mu dupunan in "SAVE". Ubus mag"Save" dupuni in "View blog".

Tuesday, October 23, 2012
Posted by Tausug Magsusulat

Magbutang Background sin Blog


By Yazir Rajim
From: http://www.alltausug.co.cc/2009/12/magbutang-background-sin-blog.html


Magsusung in adlaw, magsusung isab in kapandayan sin manga maghihinang ari-ari ha blog. Ba'gu-ba'gu ini mataud kiyasambanan website pagkakawaan background. Hambuuk daing ha manga tanug bihaun pagkakawaan background sin manga bloggers ha internet biya' na sin The Cutest Blog on the Block. Puas daing ha ini awn pa isab kaibanan biya' na sin Shabby, Free blogger Background iban sin kaibanan pa.



In pagbutang ha blog sin manga background maluhay ra. Bang ha pamandu sin The Cutest Blog on the Block bihaini in kahantang niya.



Sud kaw pa blogger.com ampa kaw kadtu pa layout, ubus dupuni in Add gadget ampa mu pi-a in add html. Pagubus mu magcopy sin code ha site piyagkawaan mu sin background hi paste mu hadja didtu ha baba' sin blank space ha add html, ampa mu hi save. Butangan hadja in widget yan ha side bar sin blog mu. Ampa mu dupuni in view blog bat mu kakitaan in lingkat sin blog mu.

Sulay kaw dugaing-dugaing background, sampay kaw makalawag background kabayaan mu iban tumuwp ha blog mu.
Posted by Tausug Magsusulat

Magpinda Templates sin Blog


by Yazir Rajim
From: http://www.alltausug.co.cc/2009/12/magpinda-templates-sin-blog.html


Bilang magba-blag kalagihan sin kita in subay imingat sin indajinis pakaradjaan manunjuki pa hikalingkat iban hikatanam sin blag ta. Hambuuk daing ha manga kalagihan subay hinangun biya' na sin magpinda Template sin blag. Mayta? Ha waktu pag-Sign-up mu ha Blogger in hidihil kaymu template amura in manga "Basic", in kamawmuhan 2 column da. Para ha manga ba'gu anad magblag kalagihan in subay sila makalabay ha basic. Karna' bang manga ibarat magbassa di haini kita tumagna umingat.

Lugay sin lugay mainu-inu kita mayta' awn manga blag pagkasambanan nakabidda' daing sin nahinang ta in dagbus, lagi malingkat pa. In mahinang ta way rugaing daing sin maginu-inu bang biyadiin in paghinang hadtu. Bang ta dayi'-dayi'un biya' dagbus mahunit hinangun, labi awla na bang kita bukun da tuud pantuk ha pangadji "Computer". In parakala' ini bakas ku kiyalabayan ha waktu ampa aku naganad-anad maghinang blag. Pagsakali, awn man nakahindu' kaku' sin pagpinda dagbus sin blag, nakapamung aku "Mahunit pa in magpais sayng". Di haini, misan mataud guidelines sin pagpinda template ha internet, pahampitun ta kamu sin kiyaingat-ingatan ha pagpinda template.

In kalagihan hinangun ha magpinda template, muna-muna subay tuud awn na blag nahinang. In paghihinangan blag amun maluhay upiksaun, lagi way bayad, amuna in Blogger.com. Bang awn na blag nahinang in katan sin kiyabutang ha kid sin blag subay hi "Save". Ha supaya misan malawa' hikabutang da magbalik. In kiyapikit (post) artikel di' dayan malawa'. Adapun in ha kid yan puas sin "text message" malanyap katan. Dipindi rakuman ha template ma download mu.

Pagubus mu magtawu' sin manga data, ukab naa kaw site amun nagtatawu' mataud templates para ha blag. Ha hal ini mataud kabaakan mu. Pagtaip hadja kaw ha google search "Templates for Blogger" mataud na maukab mu. Amu hadja subay mu mapinig in templates usalun mu karna' mataud da isab templates bukun siya para ha Blogger.com. In kawaun mu templates amun para ha Blogger tuud. Karna' awn manga templates para ha Wordpress iban kaibanan pa. Adapun awn da isab templates sin Wordpress mausal siya ha Blogger. Bang kaw makakita' awn Wordpress to Blogger converted Templates atawa unu-unu na manunjuki madtu aynakaw magduwa-ruwa bang mu kabayaan.


Bang kaw makadownload na kadtu kaw pa Layout, pagsud mu pa Layout dupuni in Edit HTML. In kakitaan mu pagubus mu magdupun sin Edit HTML biya' na sin patta' ha taas yan. Ha kabiyaksahan ku, di' na aku magSave sin HTML ha tuung yan. Magtuy aku madtu pa Choose File. Pagkadtu dupunan in Choose File, ampa batukun in piyagtaw-an sin Templates na Download. Pagbatuk ampa dupunan in Open. Pagbalik pa Edit HTML dupunan na in Upload. Ubus mag Upload bang kaw mabaya' kimita' naa ha dagbus sin blag mu ba'gu dupuni in Preview. Bang kaw kaamuhan na sin templates, dupuni in Confirm Save. Ha taas sin confirm save awn kakitaan nagsusunud-sunud manga widgets amun sung Delete tun. In manga widget yan amuna in biyayta' ku kaina hipatawu' amun nakabutang ha kid sin blag. Bang mu naSave na atawa kiyatawu' na, aynakaw maghasil hayan dupuni na magtuy in Confirm Save.

Pagubus magdupun sin confirm save kadtu nakaw pa Layout, dayawa, ampa luuni magbalik in ha kid sin blag. Bang kaw maingat da ha Photoshop hinang nakaw Head Banner amun hikatup ha blag mu. In laggu' sin Head banner yan dipindi ha bayta' sin templates na download. Ha kabiyaksahan in tiyap-tiyap templates asal awn bayta' manunjuki pa laggu' sin head Banner, Sidebar iban sin Mainpost. Bang awn asal Head banner sin blag mu, in hinangun tahan dakuman magganap atawa magkulang sin laggu'. Baya'-baya' muna maglawag templates amun katanaman mu. Di ha blag ini yan mataud ha kid kabaakan mu manga sites amun nagtatawu' sin manga templates. Mataud kabaakan mu ha internet tutorials ha paghinang iban pag-edit sin manga template.

Bang awn di' mu kahatihan binan hadja in sahawi mu ha Chatbox.

Bangman kamu makabatuk!

Monday, October 22, 2012
Posted by Tausug Magsusulat

Unu in pagtawagun Blog?

By: Yazir Rajim
From:  http://www.alltausug.co.cc/2009/12/unu-in-pagtagun-blog.html


Unu in maana sin Blog?


In pagbahasahun Blog amuna in sasabbutan hawpu' ha "Weblog". In Blog hambuuk kajinis sin "website" amun iyuupiksa' sin hambuuk tau atawa sin hambuuk tumpukan. In Blog makajari ra isab siya maanahan bang ha bahasa anggalis "To Maintain" atawa "To add content".

In Blog nagtagna' gimuwa' ha tahun 1998. Adapun timagna' siya timanug ha tahun 1999. In Blog hangkan timanyag pasalan sin maluhay upiksaun lagi' way bayad. Puas sin blogger mataud da isab jinisan blog ha Internet kapagpian. Adapun di ha pamandu ini in pini' ta amuna in "Blogger" karna' in ini mataud kalabbiyan niya daing sin kaibanan blog. In darajat sin blogger daing ha kaibanan blog nakabutang ha partangngahan.

Unu in kalabbiyan sin Blog?


In Blog mataud kalabbiyan niya pa manusiya'. Ha dunya bihaun in blog nahinang siya pagpasampayan sin unu-unu na bahana' (information) adlaw-adlaw jumatu ha babaw dunya. Duun naka labay ha pagsulat habal, pagbutang patta', pagbutang video, pagsuy-suy ha chatbox, iban sin kaibanan pa. In blog bukun hadja pagbubutangan bahana' adapun sambil pag-usaha awn da ha laum (lilayun ta man marayaw, Insya'Allah).




Sunday, October 21, 2012
Posted by Tausug Magsusulat
Tag :

Mamassa kita dayng ha kaibanan Tausug Bloggers

Support!

Support!
Add this button to your blog! Save this image and add a backlink to this website. Magsukul!

Assalamu Alaykum!

Hisiyu pa in marapat sumulat sin kissa sin hula' niya bang bukun amura in tau niya?

Hapit kamu pa Tausug Blogger (TB)! Amuna ini in tumpukan naghambuuk ha tiyap-tiyap magba-blog Tausug, Sinama, Yakan dayng ha ZamBaSulTa lapay na pa kaybanan binaybayan ha katilingkal dunya! Bisita kamu pa indaginis website/blog sin mga taymanghud natu', bat natu' maingat bang unu tuud in halawm pikilan-pangatayan sin magtaymanghud hangka-bangsa, hangja-agama.

Awn kaingatan niyu blog wala' pa nakalamud diy? Baytai niyu kami bat namu' hikabutang magtuy.
Email: anakiluhmd@gmail.com

Magsukul iban Salam kasilasa!
Powered by Blogger.

- Copyright © Tausug Bloggers -Metrominimalist- Powered by Blogger - Designed by Johanes Djogan -